Serikali yataka ujenzi unaostahimili mabadiliko ya tabianchi

Arusha. Serikali imewataka wataalamu wa sekta ya ujenzi kuzingatia usanifu na ujenzi wa majengo na miundombinu inayoweza kustahimili athari za mabadiliko ya tabianchi, huku wakihimizwa kutumia teknolojia za kidijitali na mbinu endelevu kuboresha usalama, ubora na ufanisi wa miradi.

Wito huo umetolewa leo Jumatano, Oktoba 21, 2026, na Naibu Waziri wa Ujenzi, Godfrey Kasekenya, wakati akifungua mkutano wa sita wa mwaka wa Bodi ya Usajili wa Wasanifu Majengo na Wakadiriaji Majenzi (AQRB), ulioanza jijini Arusha.

Kasekenya amesema majengo na miundombinu vinapaswa kusanifiwa na kujengwa kwa kuzingatia uwezo wa kustahimili matukio ya hali mbaya ya hewa, yakiwamo mvua kubwa, mafuriko na vimbunga, ili kupunguza maafa yanayotokana na mabadiliko ya tabianchi.

Amesema taarifa za hali ya hewa, matumizi bora ya nishati na ujenzi endelevu vinapaswa kuwa sehemu muhimu ya maamuzi ya kitaalamu, kwa lengo la kulinda usalama wa wananchi, uwekezaji na mazingira.

Pia, amesisitiza umuhimu wa kutumia teknolojia za kisasa, zikiwamo Akili Unde (AI), mifumo ya kidijitali na Teknolojia ya Uundaji wa Taarifa za Majengo (BIM), ili kuboresha usanifu na utekelezaji wa miradi ya ujenzi.

“Tanzania haiwezi kufikia Dira ya 2050 kwa kutegemea mbinu zilizopitwa na wakati. Tunahitaji wataalamu wanaotumia teknolojia kuongeza uzalishaji, kuboresha usanifu, kupunguza gharama na kuimarisha ubora wa miradi,” amesema.

Ameongeza kuwa ubunifu wa kiteknolojia unapaswa kuleta matokeo yanayopimika katika sekta ya ujenzi, badala ya kubaki kuwa mada ya majadiliano pekee.

Mkutano huo unafanyika chini ya kaulimbiu isemayo: “Kujenga Tanzania ya Dira ya 2050: Kuimarisha Ushirikiano wa Kikanda na Kimataifa kwa Mazingira Endelevu Yaliyojengwa.”

Kasekenya amesema ushirikiano wa kikanda na kimataifa ni muhimu katika kufanikisha malengo ya maendeleo ya muda mrefu ya nchi.

Amewataka wawekezaji kuimarisha uwekezaji na ubia utakaowezesha kampuni za Kitanzania kuongeza uwezo wao, huku akizihimiza kampuni za kimataifa kushirikiana na kampuni za ndani na kuhakikisha maarifa, ujuzi na teknolojia vinahamishiwa kwa wataalamu wa Tanzania.

“Hatuwezi kulinda kampuni dhidi ya ushindani; tunahitaji kujenga uwezo wake ili ziweze kushindana katika masoko ya ndani na ya kimataifa,” amesema.

Amesema hatua hizo zitaiwezesha sekta ya ujenzi kutekeleza jukumu lake muhimu katika kufanikisha Dira ya Taifa ya Maendeleo ya 2050, inayolenga kuibadilisha Tanzania kuwa uchumi wenye thamani ya dola trilioni moja.

Kwa mujibu wa Kasekenya, mafanikio ya sekta hiyo hayapaswi kupimwa kwa idadi ya majengo yanayojengwa pekee, bali pia kwa kuzingatia usalama wake, ubora, thamani ya fedha zilizowekezwa, mchango katika ukuaji wa uchumi na ustawi wa wananchi.

Amesema wasanifu majengo wanapaswa kuhakikisha majengo yanakidhi mahitaji ya wananchi huku yakihifadhi mazingira.

Kwa upande wa wakadiriaji majenzi, amesema wanapaswa kusimamia matumizi yenye tija ya fedha na rasilimali, huku wasimamizi wa miradi wakihakikisha kazi zinakamilika kwa wakati na kwa kuzingatia viwango vinavyotakiwa.

Naibu waziri huyo ameiagiza AQRB kuandaa mpango maalumu utakaobainisha mchango wa taaluma zilizo chini ya usimamizi wake katika utekelezaji wa Dira ya 2050, ukiwa na malengo bayana na viashiria vinavyoweza kupimika.

Awali, Kaimu Msajili wa AQRB, Dk Daniel Matondo, amesema mkutano huo wa AQ’26 ni fursa kwa wataalamu, taasisi za elimu na wadau wa sekta ya ujenzi kuoanisha mbinu zao za kazi, mafunzo na ubunifu na malengo ya maendeleo ya muda mrefu ya nchi.

Amesema majukumu ya bodi hiyo hayaishii katika kusajili na kudhibiti taaluma, bali yanajumuisha pia kulinda usalama wa umma, kuhamasisha matumizi ya teknolojia za kidijitali, kuimarisha uwezo wa wataalamu wa ndani na kukuza sekta ya ujenzi endelevu yenye ushindani.

Dk Matondo amewataka washiriki wa mkutano huo kutoa mapendekezo ya vitendo yatakayosaidia kuimarisha sekta ya ujenzi na kutekeleza ajenda ya maendeleo ya Tanzania.

“Tanzania ya mwaka 2050 haitajengwa mwaka 2050. Inajengwa leo kupitia maamuzi tunayofanya, wataalamu tunaowaandaa, teknolojia tunayotumia na miradi tunayotekeleza,” amesema.